വ്രതാനുഷ്ഠാനങ്ങൾക്കും ചിട്ടകൾക്കും പ്രാധാന്യമുള്ള മാസമാണ് കർക്കടകം. നിത്യേനയുള്ള രാമായണ പാരായണത്തോടൊപ്പം ചില അനുഷ്ഠാനങ്ങളും സത്‌ഫലം നൽകും.
നിത്യേന നിലവിളക്ക് തെളിയിക്കുമ്പോൾ വിളക്കത്ത് പുഷ്പമായി ദശപുഷ്പം (Dasapusham) വയ്ക്കുന്നത് സർവദേവതാ പ്രീതിക്ക് ഉത്തമമാണ്. ദശപുഷ്പത്തിലെ ഓരോ ചെടിയും ഓരോ ദേവതമാരെ പ്രതിനിധീകരിക്കുന്നു. സാധ്യമെങ്കിൽ കർക്കടകത്തിലുടനീളം ദശപുഷ്പം ചൂടുന്നതും നന്ന്.
1. കറുക
ദേവത: ആദിത്യൻ
ഫലപ്രാപ്തി: ആധി വ്യാധി ശമനം.
ഗണപതിഹോമത്തിനും, മാലകെട്ടുന്നതിനും, ബലിയിടുന്നതിനും സാധാരണ ഉപയോഗിക്കുന്ന കറുക, നിലം പറ്റി വളരുന്ന പുൽച്ചെടിയാണ്‌. ബുദ്ധിവികാസം ഉണ്ടാകാത്ത കുട്ടികൾക്ക്‌ കറുകനീര്‌ വളരെ ഫലപ്രദമാണ്‌. നട്ടെല്ലിനും തലച്ചോറിനും, ഞരമ്പുകൾക്കും ഉണ്ടാകുന്ന എല്ലാ രോഗങ്ങൾക്കും കറുകനീർ സിദ്ധൌഷധമാണ്‌.
മുലപ്പാൽ വർദ്ധിപ്പിക്കുന്നതിനും, ബുദ്ധിശക്തിക്കും ഓർമ്മശക്തിയ്ക്കും ഉത്തമമായ കറുക ആധിവ്യാധി നാശം ഉണ്ടാക്കുന്നു. തണ്ടിൻ്റെ നിറത്തിനനുസരിച്ച്‌ നീലക്കറുകയും വെള്ളക്കറുകയും ഉണ്ട്‌. അമിതമായ രക്ത പ്രവാഹം നിർത്താനും, കഫ-പിത്ത രോഗങ്ങൾക്കും കറുക ഉപയോഗിക്കാം.
സംസ്കൃതത്തിൽ ശതപർവിക, ദുവ, ഭാർഗവി എന്നൊക്കെ അറിയപ്പെടുന്നു.
2. വിഷ്ണുക്രാന്തി
ദേവത: ശ്രീകൃഷ്ണൻ
ഫലപ്രാപ്തി: വൈഷ്ണേവ പാദലബ്ധി.
ജ്വര ചികിത്സയ്ക്ക്‌ ഈ സസ്യം ഉപയോഗിക്കുന്നു. വിഷ്ണുക്രാന്തി ഇടിച്ചു പിഴിഞ്ഞ നീര്‌ രണ്ടോ മൂന്നോ ടീസ്പൂൺ കൊടുത്താൽ പനിക്ക് ആശ്വാസം കിട്ടും. ബുദ്ധിമാന്ദ്യം, ഓർമ്മക്കുറവ്‌ എന്നിവയ്ക്ക്‌ സിദ്ധൗഷധം.
തലമുടി വർദ്ധിപ്പിക്കുന്നതിനും രക്തശുദ്ധിക്കും ഉതകുന്ന ഒരു നല്ല ഔഷധമാണിത്‌. നിലത്ത്‌ പടരുന്ന ഈ ചെടിയുടെ പൂക്കൾക്ക്‌ നീല നിറമാണ്‌. ബുദ്ധിശക്തി വർദ്ധിപ്പിക്കാനും തലമുടി തഴച്ചു വളരാനും വിഷ്ണുക്രാന്തി വിശേഷപ്പെട്ടതാണ്‌.
സംസ്കൃതത്തിൽ നീല പുഷ്‌പം , ഹരികോന്തിജ എന്നു പേര്‌. കൃഷ്ണക്രാന്തി എന്നും പേരുണ്ട്‌
3. തിരുതാളി
ദേവത: ശ്രീഭഗവതി
ഫലപ്രാപ്തി: ഐശ്വര്യം.
സ്ത്രീകൾക്കുണ്ടാകുന്ന ഗർഭപാത്ര സംബന്ധമായ അസുഖങ്ങൾക്കും വന്ധ്യതയ്ക്കും പരിഹാരം കാണാൻ അത്യുത്തമം. ഈ വള്ളിച്ചെടിയിൽ പിങ്ക്‌ നിറത്തിലുള്ള പൂക്കളാണുള്ളത്‌. പിത്ത രോഗങ്ങൾ, വന്ധ്യത എന്നിവയ്ക്ക്‌ തിരുതാളി മരുന്നാണ്‌.
ഇന്ത്യയിൽ മിക്ക സ്ഥലങ്ങളിലും കാണുന്നു. ചിലഭാഗങ്ങളിൽ ഈ ചെടി ചുട്ടിത്തിരുതാളി എന്നും അറിയപ്പെടുന്നു. ഇലയുടെ മദ്ധ്യഭാഗത്തുള്ള അടയാളമാണ് ഈ പേരിന് കാരണം.
സംസ്കൃതത്തിൽ ലക്ഷ്‌മണ എന്ന് പേര്‌.
4. നിലപ്പന
ദേവത: ഭൂമിദേവി
ഫലപ്രാപ്തി: വിവേകം
ആയുർവേദത്തിൽ ഇത്‌ വാജീകരണത്തിന്‌ ഉപയോഗിക്കുന്നു. മഞ്ഞപ്പിത്തത്തിന്‌ മരുന്നായും ഇത്‌ ഉപയോഗിക്കുന്നു. ആർത്തവസംബന്ധമായ രോഗങ്ങൾക്കും, അമിത രക്തസ്രാവം, വേദന ഇവ കുറയ്ക്കാനും അത്യുത്തമം. യോനീരോഗങ്ങൾക്കും മൂത്രചുടിച്ചിലിനും നല്ല ഔഷധമാണ്‌.
5. പൂവാംകുരുന്നില
ദേവത: ബ്രഹ്മാവ്‌
ഫലപ്രാപ്തി: ദാരിദ്ര്യനാശം
മൂത്രപ്രവാഹം സുഗമമാക്കുവാനും ശരീരതാപം കുറയ്ക്കാനും രക്തശുദ്ധിയ്ക്കും വിഷം കളയുന്നതിനും നല്ലത്‌. രക്തശുദ്ധീകരണം, പനി, തേൾവിഷം എന്നിവയ്ക്ക്‌ ഔഷധമാണ്‌.
പൂവാംകുറുന്തൽ എന്നും ഇതിന് പേരുണ്ട്‌.
ശാസ്‌ത്രീയ നാമം: വെർണോനിയ സിനെറിയ. സംസ്കൃതത്തിൽ സഹദേവി എന്ന് പറയുന്നു.
6. ഉഴിഞ്ഞ
ദേവത: യമൻ
ഫലപ്രാപ്തി: ഇഷ്ടസിദ്ധി
വാതം, പനി, നീര്‌, മുടി കൊഴിച്ചിൽ എന്നിവയ്ക്ക്‌ പ്രതിവിധിയാണ്‌ ഉഴിഞ്ഞ. സുഖപ്രസവത്തിന്‌ ഉത്തമമാണ്.
സംസ്കൃതത്തിൽ ഇന്ദ്ര വല്ലിയെന്ന്‌ പേര്‌. .
7. മുക്കുറ്റി
ദേവത: ശ്രീപാർവതി
ഫലപ്രാപ്തി: ഭർതൃപുത്രസൗഖ്യം
ശരീരത്തിനകത്തെ അർശസ്‌, രക്തസ്രാവം മതുലായവയ്ക്ക്‌ അത്യുത്തമം. പ്രസവം കഴിഞ്ഞാൽ മുക്കുറ്റി ഇടിച്ചു പിഴിഞ്ഞ നീര്‌ കഴിക്കുന്നത്‌ നല്ലതാണ്‌. മുറിവുകൾ ഉണങ്ങുന്നതിന്‌ പുറത്ത്‌ ലേപനമായി ഉപയോഗിക്കാം.
അകത്തു കഴിക്കുകയും ചെയ്യാം. സമൂലം തേനിൽ ചേർത്തു കഴിച്ചാൽ ചുമ, കഫക്കെട്ട്‌ മുതലായവ ശമിക്കും. വയറളിക്കം, വ്രണങ്ങൾ കരിയുന്നതിന്‌ എന്നിവയ്ക്ക്‌ ഉപയോഗിക്കുന്നു.
സംസ്കൃതത്തിൽ ജലപുഷ്‌പം .
8. കൈയോന്നി
ദേവത: ശിവൻ
ഫലപ്രാപ്തി: പഞ്ചപാതകനാശം.
ഈർപ്പമുള്ള സ്ഥലങ്ങളിൽ തഴച്ചു വളരുന്ന ഈ സസ്യം കാഴ്ചശക്തി വർദ്ധിപ്പിക്കാൻ ഉപകരിക്കും. വാതസംബന്ധമായ എല്ലാ രോഗങ്ങൾക്കും അത്യുത്തമം. മുടി തഴച്ചുവളരാൻ, എണ്ണ കാച്ചി ഉപയോഗിക്കാം. കാഴ്ച വർദ്ധന, കഫരോഗ ശമനത്തിന് ഫലപ്രദം.
സംസ്കൃതത്തിൽ കേശ രാജ, കുന്തള വർദ്ധിനി എന്നീ പേരുകളിൽ അറിയപ്പെടുന്നു
9. ചെറൂള
ദേവത: യമധർമ്മൻ
ഫലപ്രാപ്തി: ആയുസ്സ്‌
വൃക്കരോഗങ്ങൾ തടയുന്നതിനും ശരീരത്തിലെ വിഷാംശങ്ങളെ പുറത്തു കളയുന്നതിനും ഫലപ്രദം. കൃമിശല്യം, മൂത്രക്കല്ല്‌, രക്തസ്രാവം എന്നിവയ്ക്ക്‌ ഉത്തമം. മൂത്രാശയ രോഗങ്ങൾക്ക്‌ മരുന്നായി ഉപയോഗിക്കുന്നു.
സംസ്കൃതത്തിൽ ഭദ്ര , ഭദൃക
10. മുയൽചെവിയൻ
ദേവത: കാമൻ
ഫലപ്രാപ്തി: സൗന്ദര്യം
മുയലിൻ്റെ ചെവിയോട്‌ സാദൃശ്യമുള്ള ഇലകളുള്ളതിനാലാണ്‌ ഈ പേര്‌ വീണത്‌. തൊണ്ടസംബന്ധമായ സർവ്വ രോഗങ്ങൾക്കും നല്ലത്‌.
രക്താർശസ്‌ കുറയ്ക്കുന്നതിനും നേത്രകുളിർമയ്ക്കും ഫലപ്രദം. നേത്രരോഗങ്ങൾ, ടോൺസിലൈറ്റിസ്‌, പനി തുടങ്ങിയ രോഗങ്ങൾക്ക്‌ ഔഷധമാണ്‌.
സംസ്കൃതത്തിൽ ചിത്രപചിത്ര, സംഭാരി എന്നാണ്‌ പേര്‌.
(കടപ്പാട്)
പത്തില തോരൻ എങ്ങനെ ഉണ്ടാക്കാം?